Mae Cyngor Addysgu Cyffredinol Cymru yn diogelu'r cyhoedd drwy sicrhau bod gan athrawon y cymwysterau priodol a'u bod yn cynnal safonau uchel o ymddygiad ac arfer. Mae'n gweithio ar ran athrawon i roi cyngor i’r llywodraeth ac eraill ynghylch materion addysgu a dysgu. Mae CyngACC hefyd yn gweinyddu cyllid Llywodraeth Cynulliad Cymru ar gyfer datblygiad athrawon.

Mae gan y Cyngor 25 o aelodau. Caiff deuddeg o athrawon neu benaethiaid eu hethol gan y proffesiwn addysgu, caiff naw eu penodi gan Weinidogion Cymru yn dilyn enwebiadau gan undebau athrawon a sefydliadau rhanddeiliaid eraill a chaiff pedwar aelod eu penodi'n uniongyrchol gan Weinidogion Cymru. Caiff y Cyngor ei gefnogi gan staff sydd wedi'u lleoli mewn swyddfeydd yng Nghaerdydd.

I gael manylion llawn am aelodau'r Cyngor, cliciwch yma.

O dan Ddeddf Addysg 2002,mae'n rhaid i bob athro sy'n cyflawni gwaith penodedig mewn ysgol a gynhelir fod wedi'i gofrestru gyda Chyngor Addysgu Cyffredinol Cymru (CyngACC).

Mae'r gofyniad hwn yn berthnasol ar gyfer athrawon sy'n gweithio'n llawn-amser, yn rhan-amser neu fel athrawon cyflenwi.

Anogir athrawon eraill sy'n meddu ar Statws Athro Cymwys (SAC), fel y rheiny sy'n gweithio mewn ysgolion annibynnol, yn y sector addysg bellach neu uwch, fel tiwtoriaid cartref hunangyflogedig neu'r rheiny nad ydynt yn addysgu ar hyn o bryd, i gofrestru hefyd.

Y ffi flynyddol yw £45.

Ad-delir £33 o'ch ffi drwy'r setliad cyflog i athrawon.

Ad-delir £33 o'ch ffi drwy eich setliad cyflog. Mae hyn yn digwydd er 2002, ac mae'n berthnasol yng Nghymru a Lloegr. Gan fod y ffi bellach wedi codi i £45, nid yw Llywodraeth Cynulliad Cymru'n fodlon ad-dalu'r gwahaniaeth o £12 ar ben y £33. Os ydych yn teimlo'n gryf am hyn, dylech gysylltu â'ch undeb i ddadlau dros gael yr ad-daliad llawn gan y Cynulliad. Yn 2003, dywedodd Charles Clarke, sef yr Ysgrifennydd Addysg ar y pryd, fod yr egwyddor o gael ad-daliad blynyddol wedi'i sefydlu i dalu am gost y ffi yng Nghymru a Lloegr.

Ad-delir ffi athrawon yng Ngogledd Iwerddon gan Adran Addysg Gogledd Iwerddon (ond nid drwy eu setliad cyflog). Nid yw ffioedd athrawon yn yr Alban yn cael eu had-dalu. Mae gan broffesiynau eraill ymagwedd amrywiol tuag at ad-dalu - mae rhai'n ad-dalu, ond rhai ddim.

Sefydliad	Ffi gofrestru flynyddol (cofrestriad llawn)	A gaiff y ffi ei had-dalu?
Cyngor Meddygol Cyffredinol	£410 (meddygon)	Mae llawer o gyflogwyr yn talu
Y Cyngor Nyrsio a Bydwreigiaeth	£76 (nyrsys)	Cyfraniad o 50% tuag at y ffi gadw flynyddol gan y cyflogwr
Cyngor Deintyddol Cyffredinol	£438 (deintyddion)	Yn ôl disgresiwn y cyflogwr unigol
Y Bwrdd Cofrestru Penseiri	£86 (penseiri)	Yn ôl disgresiwn y cyflogwr unigol
Cyngor Gofal Cymru	£30 (gweithwyr cymdeithasol)	Yn ôl disgresiwn y cyflogwr unigol
ISefydliad Cyfrifwyr Siartredig Cymru a Lloegr (ICAEW)	£283 os yw'r cyflog yn uwch na £22,800 y flwyddyn	Mae canran sylweddol yn hawlio ffioedd yn ôl, a delir gan y cyflogwr fel arwydd o ewyllys da

(gwybodaeth a gasglwyd ym mis Awst 2009)

Ceir y prif gostau ym maes cofrestru, gwaith safonau proffesiynol (ymchwilio i a gwrando ar achosion camymddygiad ac anghymhwysedd proffesiynol), polisi a datblygu cyngor a hybu cyfraniad cadarnhaol y proffesiwn addysgu at gymdeithas. Mae'r holl weithgareddau hyn yn cyfrannu i godi statws athrawon ac addysgu.

NID yw'ch ffi'n talu am y canlynol:

• cyllid ar gyfer Sefydlu a Datblygiad Proffesiynol Cynnar;
• cyllid ar gyfer datblygiad proffesiynol parhaus athrawon â ffocws unigol;
• dyfarnu statws athro cymwys; a
• gwrando ar apeliadau Sefydlu.

Llywodraeth Cynulliad Cymru sy'n talu am yr agweddau hyn yn eu cyfanrwydd, gan gynnwys costau staff a gweinyddu.

Cynllunnir cyllidebau manwl yn flynyddol yn rhan o'r cytundeb ar y cynllun gweithredol blynyddol. Cytunir ar y cynllun hwn gan aelodau'r Cyngor a gaiff eu hethol a'u penodi. Caiff cyllidebau a gwariant eu craffu'n fanwl yn fewnol, a chaiff eu harchwilio'n fewnol ac yn allanol, (cynhelir yr archwiliad allanol gan Swyddfa Archwilio Cymru) a thrwy gyhoeddi'r cyfrifon blynyddol.